ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ

ᑭᐊᒃᑭᐊᖅ ᐸᓂᐊ: ᐃᓕᓐᓂᐊᕐᓂᖅ ᒪᒥᓴᕐᓂᕐᓗ ᐊᐅᓪᓚᕐᓯᒪᓗᓂ ᓄᓇᒧᑦ ᐃᓄᓐᓄᑦ ᐊᕐᓇᓄᑦ

ᐃᓘᓐᓈᓂᒃ ᑕᑯᒋᐊᕐᓂᖅ:

ᑖᓐᓇ ᐱᓕᕆᐊᖑᔪᖅ ᓴᖅᑭᖅᑕᐅᓯᒪᔪᖅ ᐋᖅᑭᓱᕐᓯᒪᓪᓗᓂᓗ ᐃᓄᓐᓄᑦ ᐊᕐᓇᓄᑦ ᐃᓕᓐᓂᐊᖁᓪᓗᒋᑦ ᐱᖅᑯᓯᒃᑯᑦ ᐃᓄᐃᑦ ᐊᓐᓄᕋᔾᔨᐅᕈᓯᖏᓐᓂᒃ ᕿᓯᓐᓂᒃ ᑐᑦᑐᕋᔭᓂᓪᓗ ᓄᓇᓕᐊᕐᓯᒪᓗᑎᒃ. ᐱᕕᒃᓴᖃᖅᑎᑕᐅᑦᓯᐊᖅᑐᑦ ᑕᑉᕘᓇ ᐊᓂᐊᑦᓯᓂᕐᒥᒃ ᒪᒥᓴᕆᐊᓕᓐᓄᑦ ᐊᕐᓇᓄᑦ ᐋᓐᓂᑎᖅᑕᐅᓯᒪᔪᓄᑦ ᐅᑉᕙᓘᓐᓃᑦ ᓄᑕᕋᐅᑎᓪᓗᒋᑦ ᑲᑉᐱᐊᓱᐊᖃᑦᑕᕐᓯᒪᔪᑦ; ᓄᓇᓕᐊᕐᓯᒪᓂᖅ ᐱᕕᒃᓴᖃᖅᑎᑦᓯᒍᑕᐅᑦᓯᐊᕐᒥᔪᖅ ᐊᕐᓇᐃᑦ ᐃᖕᒥᓐᓄᑦ ᐱᔭᕆᐊᓕᖕᒥᓂᒃ ᑐᕌᖓᔪᓂᒃ ᐃᓱᒪᑐᐊᖃᑲᐃᓐᓇᖃᑦᑕᓂᕐᒥᒃ ᐊᒻᒪᓗ ᖃᓄᐃᓐᖏᑦᓯᐊᕈᑎᒃᓴᓂᒃ ᐊᒻᒪᓗ ᕿᒪᐃᓯᒪᑲᐃᓐᓇᓂᕐᒥᒃ ᐊᑉᕕᖅᑯᑕᐅᕙᑦᑐᓄᑦ ᓄᓇᓕᓐᓂ ᐃᓅᓯᖃᕐᓂᕐᒥᒃ ᐊᒻᒪᓗ ᖃᐅᑕᒫᕐᓯᐅᑎᓂᒃ ᐱᓕᕆᐊᒃᓴᒥᓐᓂᒃ.

ᑭᐊᒃᑭᐊᖅ ᐸᓂᐊ ᐱᒋᐊᓚᐅᖅᑐᖅ 2003-ᒥ ᐅᓄᖅᑐᓄᑦ ᐊᕐᕌᒍᓄᑦ ᑮᓇᐅᔭᓕᑕᐅᓪᓗᑎᒃ ᓄᓇᖃᖅᑳᕐᓯᒪᔪᑦ ᒪᒥᓴᕐᓂᕐᒧᑦ ᑐᑦᑕᕐᕕᖓᓂᒃ ᐊᒻᒪᓗ ᐋᖅᑭᓱᖅᑕᐅᓚᐅᖅᑐᖅ ᒪᒥᓴᕈᑎᒃᓴᒫᖑᓪᓗᓂ ᒪᒥᓴᕆᐊᓕᓐᓄᑦ ᐃᓕᓐᓂᐊᖅᑎᑕᐅᖃᑦᑕᕐᓯᒪᔪᓄᑦ ᐊᓐᓇᓯᒪᔪᓄᑦ ᐊᒻᒪᓗ ᑕᐃᒃᑯᓄᖓ ᐊᒃᑐᖅᑕᐅᓯᒪᔪᓄᑦ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑐᑦ ᑭᖑᕚᖏᓐᓄᑦ.

ᑎᑎᖅᑭᕆᓂᖅ ᐃᓚᓕᐅᔾᔭᐅᓯᒪᔪᖅ ᑕᑉᕗᖓ ᐱᓕᕆᐊᒧᑦ ᐃᓅᓕᕋᑦᑕ ᐅᓪᓗᒥ ᐱᖕᒪᕆᐅᑎᑦᓯᔪᓂᒃ ᐊᔪᓐᖏᓐᓂᕆᔭᐅᒋᐊᓕᓐᓂᒃ ᓲᕐᓗ ᐅᖃᓕᒫᕐᓂᖅ ᑎᑎᕋᕐᓂᕐᓗ ᑎᒍᓯᒍᑎᒃᓴᐅᓪᓗᑎᒃ ᐃᖅᑲᓇᐃᔮᒥᒃ ᑮᓇᐅᔾᔭᑦᓴᐅᑎᒃᓴᒥᒃ ᐅᑉᕙᓘᓐᓃᑦ ᐃᓕᓐᓂᐊᑲᓐᓂᓂᕐᒥᒃ ᐃᓕᓐᓂᐊᑲᓐᓂᕐᕕᐅᕙᑦᑐᓂ.

ᐱᓕᕆᐊᖅ ᓇᓗᓇᐃᔭᕐᓯᒪᓂᖓ:

ᐊᕐᓇᐃᑦ ᐃᓕᓐᓂᐊᕐᓗᑎᒃ ᕿᓯᓕᕆᓂᕐᒥᒃ ᑐᑦᑐᕋᔭᓕᕆᓂᕐᒥᓪᓗ ᐊᓐᓄᕌᑦᓴᓂᒃ ᐊᒻᒪᓗ ᐱᓕᕆᐊᖃᕐᓗᑎᒃ ᓇᓖᕌᕐᓗᑎᒃ ᐃᓱᒪᕐᓱᕐᓗᑎᒃ ᐱᓕᕆᐊᒃᓴᓂᒃ. ᑖᒃᑯᓂᖓ ᐊᔪᓐᖏᓐᓂᕆᔭᐅᒋᐊᓕᓐᓂᒃ ᐃᓕᓴᐃᕙᑦᑐᑦ ᐃᓐᓇᐃᑦ ᐊᓐᓄᕋᔾᔨᐅᑏᓪᓗ ᒥᖅᓱᖅᑏᑦ ᐊᒻᒪᓗ ᐃᓕᓐᓂᐊᖅᑎᑕᐅᓪᓗᑎᒃ ᐱᖅᑯᓯᒃᑯᑦ ᐊᓐᓄᕋᔾᔨᐅᕈᓯᕐᓂᒃ ᐊᑐᖅᑐᑎᒃ ᐊᒡᒐᒥᓂᒃ ᐆᑦᑐᑎᖃᖅᑐᑎᒃ.

ᕿᓯᓕᕆᓂᖅ ᐱᓕᕆᐊᖑᔭᕆᐊᖃᕐᒪᑦ ᐊᒥᓱᓂᒃ ᐊᑐᕐᓗᓂ ᐱᕈᓐᓇᑦᓴᐃᓂᕐᒥᒃ ᖃᓄᐃᑦᑐᒥᒃ ᕿᓯᒻᒥᒃ ᐊᑐᕆᐊᖃᕐᓂᕐᓄᑦ, ᕿᓯᒃ (ᒥᖅᑯᓕᒃ) ᐅᑉᕙᓘᓐᓃᑦ ᓇᓗᐊᒃ/ᑭᐊᒃᑕ ᒥᖅᑯᐃᔭᕐᓯᒪᔪᖅ ᖃᑯᕐᓯᑎᑕᐅᓯᒪᓪᓗᓂ ᐅᑉᕙᓘᓐᓃᒃ ᒫᒃᑕᒃ/ᒪᒃᑕᓕᒃ ᒥᖅᑯᐃᔭᕐᓯᒪᔪᖅ ᕿᕐᓂᖅᑑᓪᓗᓂ ᐊᒻᒪᓗ ᒥᖅᑯᐃᔭᕐᓯᒪᔪᖅ ᕿᓂᕐᓯᑎᑕᐅᓯᒪᓪᓗᓂ ᐊᒻᒪᓗ ᒥᖅᑯᐃᔭᐃᓂᖅ ᑐᕌᖓᒻᒥᔪᖅ ᐅᔾᔪᒐᔭᓐᓄᑦ ᐊᑐᖅᑕᐅᒐᔪᑦᑐᓄᑦ ᐊᑐᖓᓕᐊᖑᓪᓗᑎᒃ.

ᑲᒻᒥᐅᕐᓂᖅ ᐊᑯᓂᐅᒍᓐᓇᖅᑐᖅ ᒪᓕᓪᓗᒋᑦ ᐊᔪᓐᖏᓐᓂᓕᕇᑦ ᐊᒻᒪᓗ ᑲᒻᒥᐅᖅᑏᑦ ᐊᒻᒪᓗ ᖃᓄᐃᑦᑑᓂᖏᓐᓂᒃ ᑲᒻᒥᐊᑦᓴᑦ ᐊᑐᖅᑕᐅᔪᑦ ᕿᓯᐅᑉᐸᑕ ᐅᑉᕙᓘᓐᓃᑦ ᑐᑦᑑᑉ ᓂᐅᖏᓐᓂᒃ.

ᐊᓐᓄᕋᔾᔨᐅᕐᓂᖅ ᑐᑦᑐᕋᔭᒥᒃ ᐊᑯᓂᐅᓂᕐᓴᐅᓲᖅ ᕿᑐᒻᒪᑦᓴᕆᐊᖃᕐᓂᖓᓄᑦ ᑐᑦᑐᕋᔭ ᐅᓪᓗᓂᒃ ᒪᕐᕉᓐᓂᒃ−ᐱᖓᓱᓄᑦ ᑖᓐᓇᑐᐊᖅ ᑲᒪᒋᔭᐅᓲᖅ ᕿᑐᒻᒪᑦᓯᐊᖁᓪᓗᒍ ᒥᖅᓱᕋᑦᓴᓕᐊᕆᓗᒍ ᐊᒻᒪᓗ ᑭᓱᓕᐅᕐᓂᐅᓂᕐᒧᓪᓗ ᖃᕐᓕᓕᐅᕐᓂᐊᕐᐸᑦ ᐅᑉᕙᓘᓐᓃᑦ ᐊᑎᒋ (ᒥᖅᑯᖓ ᐃᓗᐊᓃᖔᕐᓗᓂ) ᐅᑉᕙᓘᓐᓃᑦ ᖁᓕᑦᑕᖅ (ᒥᖅᑯᖓ ᓯᓚᑖᓃᑦᑐᖅ) ᐊᒻᒪᓗ ᐱᑐᐃᓐᓇᐅᖏᓐᓂᖓᓄᑦ ᓴᓇᒻᒪᖓ ᐊᖏᓂᖓᓗ.

ᐳᐊᓗᐃᑦ ᑐᑦᑑᑉ ᓂᐅᖏᓐᓂᒃ ᕿᓯᓐᓂᓘᓐᓃᑦ (ᒥᖅᑯᖃᕐᓗᓂ ᒥᖅᑯᐃᕐᓯᒪᓗᓂᓘᓐᓃᑦ) ᕿᓚᒥᐅᓂᕐᐹᖑᓲᑦ ᓴᓇᓗᒋᑦ.

ᐃᓕᓐᓂᐊᕐᓂᖅ ᐱᖅᑯᓯᒃᑯᑦ ᐃᓄᐃᑦ ᐊᓐᓄᕋᔾᔨᐅᕈᓯᖏᓐᓂᒃ ᓲᕐᓗ ᐊᑎᒋ, ᖃᕐᓖᑦ, ᑲᒦᑦ ᐳᐊᓗᐃᓪᓘᓐᓃᑦ ᑲᒪᒋᓗᒋᑦ ᕿᐊᓱᓐᖑᓇᖅᑐᒻᒪᕆᐊᓗᒃ ᑲᓱᕈᑕᐅᒻᒪᑦ ᐃᓘᓐᓇᑎᓐᓄᑦ ᓯᕗᓕᑦᑕ ᖃᐅᔨᒪᓂᖏᓐᓄᑦ; ᐅᓄᖅᑐᑦ ᐊᕐᓇᐃᑦ ᑕᐸᐃᖃᑦᑕᓲᑦ ᐊᖓᔪᖅᑳᒥᓂᒃ ᐊᒻᒪᓗ ᐃᕐᖑᑕᕆᔭᐅᕕᖕᒥᓂᒃ ᐊᒻᒪᓗ ᐊᔪᓐᖏᑦᑐᒥᓂᐅᓂᖏᓐᓂᒃ ᐊᓐᓇᓯᒪᓂᕐᒥᒃ ᐅᑭᐅᖅᑕᖅᑐᒥ ᐊᒻᒪᓗ ᐃᒃᑮᓇᖅᑐᐊᓗᒻᒥ ᐊᒻᒪᓗ ᐅᐱᒍᓱᒃᑲᓐᓂᕈᑕᐅᓪᓗᑎᒃ ᓇᑭᓐᖔᕐᓯᒪᓂᕐᒥᓂᒃ ᐊᒻᒪᓗ ᐃᖕᒥᓐᓂᒃ.

ᑎᑎᕋᖃᑦᑕᖅᑐᑎᒃ ᒪᒥᓴᕐᓂᕐᒧᑦ (ᑎᑎᖅᑭᕆᓂᕐᒨᖓᔪᖅ) ᐅᓐᓄᓴᑕᒫᑦ, ᑎᑎᕋᕆᐊᖃᖅᑎᑕᐅᓯᒪᓂᒃᑯᑦ ᐊᐅᓚᖃᑦᑕᖅᑕᕗᑦ ᐃᓗᑦᑎᓃᓐᖔᖅᑐᒥᒃ ᐊᒻᒪᓗ ᐅᑉᐱᕆᖃᑦᑕᐅᑎᓂᖅ ᑕᑉᕘᓇ ᓴᖅᑭᖅᑐᓂ ᐊᒻᒪᓗ ᐊᕐᓇᐃᑦ ᓯᓚᑦᑐᑲᓐᓂᓂᕐᒥᓂᒃ ᐃᑉᐱᒋᓪᓗᑎᒃ ᐅᓂᒃᑳᖃᑦᑕᓲᑦ ᐋᓐᓂᕐᓯᒪᐅᑎᒥᓂᒃ ᐊᑐᕐᓯᒪᔭᒥᓂᒃ ᐊᒻᒪᓗ ᒪᒥᓴᕐᐸᓪᓕᐊᓂᕐᒧᑦ ᐱᒋᐊᕈᑕᐅᓕᖅᑐᓂ. ᐃᓐᓇᐃᑦ ᐃᓅᓯᓕᕆᔨᒋᔭᐅᓪᓗᑎᒃ ᓇᒡᓕᒍᓱᑦᑐᒻᒪᕆᐅᓲᑦ ᐊᒻᒪᓗ ᐃᓐᓇᐃᑦ ᐃᑉᐱᓐᓂᐊᔪᓂᒃ ᓂᑲᒍᓱᒃᑲᐅᓪᓗᑎᒃ ᑭᓇᑐᐃᓐᓇᕐᒥᒃ ᐊᒻᒪᓗ ᐊᑐᕐᓯᒪᔭᒥᒍᑦ ᖃᐅᔨᒪᔭᒥᓂᒃ ᐊᑐᖃᑦᑕᓲᑦ ᐊᔾᔨᒌᓐᖏᑐᖅᑎᒍᑦ.

ᖃᐅᔨᒋᐊᕐᕕᒃᓴᖅ:

ᑕᐃᓯ ᐸᓂᑲ
ᐃᕐᖐᓐᓈᕈᑖ: dpanika@kivalliqinuit.ca
ᐅᖄᓚᐅᑖ: 867-645-2348